Жорий мавсумда «Нефтчи» таркибида ҳимоячи амплуасида тўп суриб, нафақат мудофаа, балки ҳужум чизиғини кучайтиришда ҳам ўрнак кўрсатиб келган, ушбу фаоллигини Ўзбекистон Миллий терма жамоаси сафида ҳам мазмунли ўйин намойиш эта олган маҳоратли футболчи Иброҳимхалил Йўлдошев янги мавсумни ҳам «Нефтчи» сафида давом эттиришга қарор қилди. Клуб ва футболчи ўртасидаги шартнома яна икки йилга узайтирилди.

"Иброҳимхалил ўтган мавсумда жамоанинг асосий таркиб футболчиларидан бири сифатида Суперлига баҳсларида мунтазам майдонга тушиб, ҳимоядаги ишончли ҳаракатлари билан бир қаторда, ҳужумларда ҳам фаол иштирок этди. Унинг тезкорлиги, универсаллиги ва ўйин интизоми жамоамиз ўйин тизимида муҳим роль ўйнади.

Унинг ҳар бир учрашувдаги фидойилиги ва жанговар руҳи жамоамизга нафақат натижа, балки барқарорлик ҳам олиб келди. Ишонамизки, Иброҳим Ҳалил Йўлдошев янги мавсумда ҳам жамоамизнинг чемпионлик байроғини баланд кўтариб, халқаро майдонларда «Нефтчи» номининг янада кенг тарқалишига муносиб ҳисса қўшади",  дейилади клуб матбуот хизмати тарқатган хабарда.