"Борнмут" марказий ҳимоячиси Маркос Сенеси ниҳоят қишда "Барселона"га кўчиб ўтиши мумкин.

Каталония гранди январда катта трансфер харажатларисиз ҳимояни кучайтиришни режалаштирмоқда ва 28 ёшли аргентиналик асосий номзодлардан бири. Sport нашри хабарига кўра, "Барселона" Сенесига 2018 йилда, у ўз ватанида "Сан-Лоренцо" шарафини ҳимоя қилаётганида кўз тиккан. Бир йил ўтгач, футболчини Нидерландиянинг "Фейеноорд" клуби сотиб олди, аммо "кўк-анорранглилар" вакиллари аниқ қадамлар қўймай, футболчини кузатишда давом этишди.

"Борнмут" шарафини у 2022 йилдан буён ҳимоя қилиб келмоқда. Футболчининг "гилослар" билан амалдаги шартномаси тез орада - жорий мавсум якунлангач ўз ниҳоясига етади.