«Манчестер Сити» бош мураббийи Хосеп Гвардиола қийин даврларда клуб раҳбарияти томонидан кўрсатиладиган қўллаб-қувватлаш ҳақида сўз юритди. У мисол сифатида ўтган мавсумни келтирди: ўша пайтда «шаҳарликлар»нинг ўйини ва натижалари барқарор эмас эди, бироқ Гвардиоланинг сўзларига кўра, раҳбарият жамоани жиддий тарзда қўллаб-қувватлаб турган.

«Ҳар сафар ўтган мавсум воқеаларини эсласам, клуб сифатида эришган ютуқларимиз билан фахрланаман. Шунингдек, қийинчиликларни қандай енгиб ўтганимиз билан ҳам фахрланаман. Клуб раҳбарияти бизга қандай ёрдам берганини эслайман — улар доимий равишда руҳлантириб туришарди: “Олға, олға, олға!” Бу фақатгина шундай ажойиб клубда бўлиши мумкин!» — дея Гвардиоланинг сўзларини «Манчестер Сити» матбуот хизмати келтиради.

Эслатиб ўтамиз, ўтган мавсумда «Манчестер Сити» Англия Премьер-лигасида учинчи ўринни эгаллаган.