Янги мавсумга жиддий тайёргарлик кўраётган «Локомотив» футбол клуби қишки трансфер ойнасида таркибини бир қатор футболчилар билан кучайтирди. «Темирйўлчилар» сафига ҳимоячи Суннатилла Поёнов, ярим ҳимоячи Николай Иванов, шунингдек, клуб мухлисларига яхши таниш бўлган Темурхўжа Абдуқолиқов ва Сардор Мирзаев қайта қўшилди.

21 ёшли ҳимоячи Суннатилла Поёнов ўтган мавсум «Сурхон» таркибида 24 та учрашувда иштирок этиб, 1 та гол муаллифи бўлди. Шунингдек, у Ўзбекистон U-20 терма жамоаси сафида 4 та баҳсда майдонга тушган. Янги мавсумда Поёнов «Локомотив» шарафини ҳимоя қилади.

Беларус чемпионатининг ўтган мавсумида бронза медалларини қўлга киритган 25 ёшли марказий ярим ҳимоячи Николай Иванов ҳам жамоага қўшилди. У Беларуснинг «Славия» клуби сафида 31 та ўйинда 7 тадан гол ва ассист қайд этган, шунингдек, чемпионатда 36 та голли вазият яратиб, ушбу кўрсаткич бўйича 5-ўринни эгаллаган. Қизиқ жиҳати, Иванов Россия футбол тарихи­даги энг тезкор гол муаллифи ҳисобланади — у 2024 йилда «Машук» таркибида «Химки» дарвозасини 4-сониядаёқ ишғол қилган.

Шу билан бирга, 4 мавсумлик танаффусдан кейин «Локомотив»нинг энг сермаҳсул футболчиларидан бири Темурхўжа Абдухолиқов жамоага қайтди. У клуб тарихида 161 та ўйинда 79 та гол ва 10 та ассист қайд этган. Ўтган мавсумда «Бунёдкор» сафида ҳаракат қилган ҳужумчи 25 та баҳсда 8 та гол ва 3 та ассист муаллифи бўлди.

Яна бир катта қайтиш — ярим ҳимоячи Сардор Мирзаев билан боғлиқ. 2014–2019 йиллар давомида «Локомотив» сафида 166 та ўйинда 36 та гол ва 11 та ассист қайд этган Мирзаев 2020 йилдан буён фаолиятини хорижда ва бошқа клубларда давом эттирган. У Тайланднинг «Муангтонг Юнайтед» жамоасида 91 та ўйинда 29 та гол ва 18 та ассист қайд этган, ўтган мавсумни эса ОКМК таркибида ўтказди.

Шу тариқа, «Локомотив» янги мавсум олдидан таркибини тажриба ва ёшлик уйғунлиги билан мустаҳкамлаб, Суперлигада юқори мақсадлар сари қадам қўймоқда.