"Тоттенхэм"нинг португалиялик ярим ҳимоячиси Жоау Палинья жорий мавсум якунлангач, "Бавария"га қайтиши мумкин.

TEAMtalk нашри тарқатган хабарга кўра, "Тоттенхэм"да футболчининг шартномасини сотиб олиш бўйича ҳали бир қарорга келинмаган. Хавбекнинг ўзи эса мавсум якунлангач ҳам Лондонда қолишни истаётганини яққол сездириб қўйди. Таъкидланишича, Палиньянинг келажаги кўп жиҳатдан Томас Франк учун мавсумнинг қолган қисми қандай бўлишига боғлиқ бўлади.

Жорий мавсумда 30 ёшли Палинья барча мусобақаларда 25 та ўйинда майдонга тушиб, рақиблар дарвозасини тўрт марта ишғол қилди ва учта голли узатмани амалга оширди.

Transfermarkt портали мутахассислари ярим ҳимоячининг нархини 25 миллион еврога баҳоламоқда.