"ПСЖ" вингери Хвича Кварацхелиянинг "Париж"га қарши Париж дербисида иштирок этиши сўроқ остида қолмоқда. Футболчи кеча бўлиб ўтган машғулотларда жароҳат олган ва ҳозирда уйида индивидуал дастур асосида ишламоқда. Бу ҳақда франциялик журналист Артур Пьерро ўзининг Х ижтимоий тармоғидаги саҳифасида маълум қилди.
Манбага кўра, футболчининг Лига 1 17-тур ўйинига тайёрлиги бўйича якуний қарор учрашув бошланишига яқин қабул қилинади. Учрашув эртага, 4 январь куни бўлиб ўтиши режалаштирилган.
Бу мавсумда грузиялик футболчи 20 та ўйинда майдонга тушиб, 6 та гол урди ва 5 та голли узатмани амалга оширди. Transfermarkt портали маълумотларига кўра, Кварацхелиянинг нархи 90 млн еврони ташкил этади.
