Мадриднинг “Атлетико” клуби ҳужумчиси Александр Сёрлотга “Ювентус” жиддий қизиқиш билдирмоқда. Бу ҳақда Football Espana нашри хабар бермоқда.

Манбага кўра, туринликлар Сёрлотни Душан Влаҳовичнинг ўринбосар сифатида кўрмоқда. Сербиялик футболчининг туринликлар билан шартномаси 2026 йилнинг ёзида якунига етади. Шу боис клуб “Атлетико” ҳужумчисини ўз сафига қўшиб олмоқчи. “Ювентус” норвегиялик ҳужумчига асосий таркибдан жой таклиф қилишга тайёр. “Атлетико” эса футболчи учун 32 миллион евро талаб қилмоқда.

Аввалроқ Сёрлотга “Ливерпуль”, “Фенербаҳче” ва “Галатасарой” клублари ҳам қизиқиш билдираётгани хабар қилинганди. Ҳужумчининг мадридликлар билан шартномаси 2028 йил 30 июнгача амал қилади.

Маълумот учун, жорий мавсумда Сёрлот “Атлетико” сафида жами 22 та учрашувда майдонга тушиб, ўз ҳисобига 5 та гол ва 1 та голли узатма ёздириб қўйган. Transfermarkt портали футболчининг қийматини 20 миллион еврога баҳолаган.