Янги мавсум олдидан ОКМК ФК клубнинг спорт сиёсати доирасида асосий жамоа таркибини шакллантириш бўйича изчил ва тизимли ишларни амалга оширмоқда. Ушбу жараёнда ёш, маҳаллий ҳамда клубнинг узоқ муддатли ривожланиш стратегиясига мос футболчиларни жалб этишга алоҳида эътибор қаратилмоқда.

Шунингдек, «кончилар» сафини тарк этган футболчилар ўрнини клубнинг ривожланиш фалсафаси, танланган ўйин модели ва институционал мақсадларига мос ижрочилар билан тўлдириш асосида мувозанатли трансфер сиёсати изчил олиб борилмоқда.

Мазкур трансфер сиёсати доирасида қишки трансфер ойнасидаги навбатдаги трансфер амалга оширилди. Ярим ҳимоячи Ҳазратжон Турсунқулов ОКМК ФК сафини тўлдирди. Футболчи билан икки йиллик шартнома имзоланди ва у янги мавсумдан бошлаб «кончилар» шарафини ҳимоя қилади.

Маълумот учун, 26 ёшли таянч ярим ҳимоячи бунга қадар «Оқ-тепа», «Металлург», «Динамо» ҳамда «Хоразм» клубларида тўп сурган. У профессионал фаолияти давомида 117 та учрашувда майдонга тушиб, 15 та гол ва 6 та голли узатма муаллифига айланган.

"ОКМК ФК раҳбарияти янги футболчимиз жамоага қўшадиган салоҳияти ва юқори даражадаги профессионал маҳорати орқали клубимизнинг ғалабалари ва муваффақиятларини янада мустаҳкамлашга, шунингдек, унинг келажакдаги ўйинларда жамоа ўйинига қўшадиган ҳиссаси клуб муваффақиятларини янада юксалтиради, деган ишончни билдиради", — дейилади ОКМК матбуот хизмати тарқатган хабарда.