"Монако" клуби қанот ҳужумчиси Магнес Аклиуш фаолиятини "Тоттенхэм"да давом эттириши мумкин. Бу ҳақда TEAMtalk хабар бермоқда.
Манбага кўра, "шпорлар" 23 ёшли "Монако" футболчисини ўз сафига қўшиб олиш учун бор кучини ишга солмоқда. Монаколиклар вингернинг трансфери учун 57 миллион евродан кўпроқ пул сўраши кутилмоқда. Эслатиб ўтамиз, Аклиушга "Тоттенхэм" қизиқиш билдираётгани ҳақида ўтган йилнинг охирида хабар берилганди.
Жорий мавсумда француз барча мусобақаларни ҳисобга олган ҳолда 23 та ўйинда майдонга тушиб, 3 та гол урди ва 5 та голли узатмани ўз ҳисобига ёздириб қўйди.
Аклиушнинг "Монако" билан шартномаси 2028 йилгача мўлжалланган. Transfermarkt мутахассислари футболчининг нархини 45 миллион еврога баҳоламоқда.
