U-23 Осиё кубоги 1-тур ўйинлари олдидан матбуот анжумани ташкил этилди. Тадбирда бош мураббий Равшан Ҳайдаров ҳамда футболчимиз Сайдумархон Сайднуруллаев иштирок этди.

Равшан Ҳайдаров:
— Ассалому алайкум. Аввало, мана шу мусобақада иштирок этяпмиздан хурсандмиз. Ташкилий томондан ҳаммаси ажойиб, ОФК ва маҳаллий ташкилий қўмитага миннатдорчилик билдираман, барча жамоаларга омад тилайман.

— Биз бу мусобақани яхши кўрамиз ва ҳурмат қиламиз. Турнирда рейтингимиз баланд, ҳар доим юқори натижалар қайд этиб келамиз. Ўйлайманки, бу галги мусобақада ҳам муносиб иштирок этиб, юқори натижага эришамиз.

Гуруҳдаги рақиблар ҳақида:
— Албатта, гуруҳимизда кучли жамоалар йиғилган. Уларнинг тажрибалари ва имкониятларини биламиз. Ёш таркиб билан иштирок этишимизга қарамай, мен жамоамга ишонаман. Футболчилар билан суҳбатда бу турнир уларга кўприк вазифасини ўтаб беришини айтдим.

Сайдумархон Сайднуруллаев:
— Тайёргарлик яхши бўлди. Дастлаб Тошкентда, кейин Қатарда йиғин ўтказдик. Адаптация етарли бўлди. Асосий мақсадимиз — мусобақада муносиб қатнашиб, юқори натижа қайд этиш.

Ички муҳит ҳақида:
— Ички муҳит ажойиб, ҳамма яхши кайфиятда. Олдимизда қандай турнир турганини биламиз ва жамоамиз мусобақага 100 фоиз тайёр.