U-23 Osiyo kubogi 1-tur o‘yinlari oldidan matbuot anjumani tashkil etildi. Tadbirda bosh murabbiy Ravshan Haydarov hamda futbolchimiz Saydumarxon Saydnurullayev ishtirok etdi.
Ravshan Haydarov:
— Assalomu alaykum. Avvalo, mana shu musobaqada ishtirok etyapmizdan xursandmiz. Tashkiliy tomondan hammasi ajoyib, OFK va mahalliy tashkiliy qo‘mitaga minnatdorchilik bildiraman, barcha jamoalarga omad tilayman.
— Biz bu musobaqani yaxshi ko‘ramiz va hurmat qilamiz. Turnirda reytingimiz baland, har doim yuqori natijalar qayd etib kelamiz. O‘ylaymanki, bu galgi musobaqada ham munosib ishtirok etib, yuqori natijaga erishamiz.
Guruhdagi raqiblar haqida:
— Albatta, guruhimizda kuchli jamoalar yig‘ilgan. Ularning tajribalari va imkoniyatlarini bilamiz. Yosh tarkib bilan ishtirok etishimizga qaramay, men jamoamga ishonaman. Futbolchilar bilan suhbatda bu turnir ularga ko‘prik vazifasini o‘tab berishini aytdim.
Saydumarxon Saydnurullayev:
— Tayyorgarlik yaxshi bo‘ldi. Dastlab Toshkentda, keyin Qatarda yig‘in o‘tkazdik. Adaptasiya yetarli bo‘ldi. Asosiy maqsadimiz — musobaqada munosib qatnashib, yuqori natija qayd etish.
Ichki muhit haqida:
— Ichki muhit ajoyib, hamma yaxshi kayfiyatda. Oldimizda qanday turnir turganini bilamiz va jamoamiz musobaqaga 100 foiz tayyor.
