2025 йил давомида йирик халқаро турнирларда қўлга киритилган мукофот пуллари бўйича энг кўп даромад топган шахматчилар рўйхатини эълон қилинди. Бу ҳақда “Chess.com” нашри хабар берди. Мазкур рўйхатдан икки нафар ўзбекистонлик шахматчи ҳам жой олди.

Ўзбекистоннинг биринчи рақамли гроссмейстери Нодирбек Абдусатторов 2025-йилда 16 та турнирда иштирок этиб, жами 361 минг 811 доллар мукофот пули жамғарган. Шахматчининг йил давомида олган энг катта бир марталик мукофоти 85 000 долларни ташкил этган. Спортчи рўйхатнинг 10-поғонасидан жой олди.

Жавоҳир Синдоров эса 11 та турнирда қатнашиб, жами 349 минг 955 доллар мукофот пули билан кучли ўнталикдан жой олди. Унинг энг катта бир марталик ютуғи 120 000 доллар бўлиб, бу маблағ FIDE Жаҳон кубогидаги ғалаба эвазига қўлга киритилган.

Дунёнинг биринчи рақамли гроссмейстери Магнус Карлсен 2025 йил давомида энг кўп мукофот қўлга киритган шахматчига айланди. У йил давомида 16 та турнирда иштирок этиб, жами 1 миллион 455 минг доллар мукофот қўлга киритган. Иккинчи поғонадан Фабиано Каруана жой олди (889 минг 598 доллар). Кучли учликни эса 751 минг 881 доллар билан Левон Арониан якунлаган.

Маълумот учун, декабрь ойи якунларига кўра, Нодирбек Абдусатторов 2750 очко билан FIDE рейтингида 12-ўринни эгаллаб турибди. Жавоҳир Синдоров эса 2729 очко билан 21-поғонани банд этган.