Футбол жамоатчилиги Леннарт Карлнинг яқинда Мадриднинг "Реал" клубида ўз кучини синаб кўриш истаги ҳақидаги сўзларини муҳокама қилишда давом этмоқда.

17 ёшли футболчи "Бавария"да ўйнаш имкониятини қадрлашини, аммо бир кун келиб "қироллик клуби"га ўтишни орзу қилишини айтди. Ушбу изоҳлар турли муносабатларни келтириб чиқарди ва ҳатто футболчининг кетиши мумкинлиги ҳақида миш-мишлар пайдо бўлди. Шунга қарамай, журналист Тоби Алтшеффлнинг ёзишича, мюнхенликлар раҳбарияти ёш юлдуз билан шартномани 2031 йилгача узайтирмоқчи. Ҳужумкор ярим ҳимоячининг маоши ҳозирги 1-2 млн евродан йилига 5-7 млн еврога ошади.

Леннарт Карлнинг "Бавария" билан амалдаги меҳнат шартномаси 2028 йилнинг ярмигача мўлжалланган.