Шотландиянинг «Хартс» клуби мухлислари Қозоғистон миллий терма жамоаси вингери Ислом Чесноков билан профессионал шартнома имзоланиши фонида Марказий Осиё давлатларидан етишиб чиқаётган истиқболли футболчиларни муҳокама қилди, деб хабар беради Sports.kz.
«Такрорлайман, аммо бу ҳудуд (Марказий Осиё) ҳақиқатан ҳам истеъдодли ўйинчиларни етиштириб чиқара бошлади, айниқса Ўзбекистон ва Қозоғистон. Яқинда “Манчестер Сити” Ўзбекистондан футболчи билан шартнома имзолади, “Челси” эса “Қайрат”дан ўйинчи трансферини расмийлаштирди. Ҳатто Ислом билан иш битмаса ҳам, келажакда айнан шу минтақага эътибор қаратиш тўғри, деб ҳисоблайман», — деб ёзади бир мухлис фан-сайтда.
Гап Қозоғистон миллий терма жамоаси ҳужумчиси Дастан Сатпаев ҳақида бормоқда. У 2026 йил август ойида Лондоннинг «Челси» клубига қўшилиши кутилмоқда. Шунингдек, айни пайтда «Манчестер Сити» сафида тўп сураётган Ўзбекистон миллий терма жамоаси ҳимоячиси Абдуқодир Ҳусанов ҳам тилга олинган.













