25 ёшли исроиллик дарвозабон Даниэл Перец Мюнхеннинг "Бавария" клубини вақтинча тарк этди. Бу ҳақда немис гранди матбуот хизмати хабар берди.
Дарвозабон фаолиятини "Саутгемптон"да давом эттиради. Инглиз клуби Перецни жорий мавсум якунига қадар ижарага олди. Эслатиб ўтамиз, исроиллик футболчи ўйин кампаниясининг дастлабки қисмини "Гамбург" сафида ўтказди.
Даниэл Мюнхен жамоаси сафига 2023 йилда қўшилди. У "Маккаби"дан "Бавария"га ўтган эди. Германия жамоаси сафида Перец атиги еттита учрашув ўтказган. Мюнхенликлар билан биргаликда дарвозабон ўтган мавсумда чемпионликни қўлга киритди.
