"Металлург" - "Навбаҳор" учрашувидан кейин ҳар иккала жамоа бош мураббийлари матбуот анжуманида ўз фикрлари билан ўртоқлашишди.

Рустам Мирсодиқов, “Металлург” жамоаси бош мураббийи:
— Давралар оралиғида футболчиларнинг жисмоний тайёргарлигини оширишга катта эътибор қаратдик. Назорат ўйинларида қатнашдик. Бу мавсум охиригача ўз самарасини бериши керак. Ўртоқлик учрашувларини расмий ўйинлар билан таққослаб бўлмайди. Шундан бўлса керак, шогирдларимнинг ўйинга киришиб кетиши оғир кечди. Иккинчи таймдаги тезкор голлардан кейин ўзимизни бироз хотиржам ҳис этдик. Натижа ўйинга хос бўлди деб ўйлайман.

Мустафо Байрамов, “Навбаҳор” жамоаси бош мураббийи:
— “Металлург”ни ажойиб ғалаба билан табриклайман. “Металлург” олий лигадаги кучли, ўз ўйинига эга жамоалардан бири. Бекободликларда таркиб 3-4 йилдан буён ўзгаришсиз сақланиб келяпти. Шунинг учун ҳам улар бир текис натижа кўрсатишмоқда. Бизнинг таркибимизда эса йўқотишлар бор. Илҳом Бойдедаев жароҳат боис, Қаҳрамон Муҳаммаджонов ва Тимур Султоновлар дисквалификация туфайли майдонга туша олишмади. Бу эса ўйинимизга салбий таъсир кўрсатди. Олдинда водий дербиси бизни кутиб турибди. Қийин ўйин бўлади. Бироқ ғалаба қозонишга ҳаракат қиламиз, мухлисларимиз биздан бошқа натижани кутишмаяпти.