Англиянинг “Челси” клуби Жуд Беллингем бўйича йирик трансфер таклифини юборди. Бироқ “Реал Мадрид” раҳбарияти англиялик ярим ҳимоячини сотиш масаласини кескин рад этди. Бу ҳақда Фичажес нашри хабар берди.

Қайд этилишича, 22 ёшли Беллингем “Реал Мадрид”нинг энг муҳим активларидан бири ҳисобланади. У “Сантяго Бернабеу”га келганидан буён барқарор ривожланиб, майдондаги таъсири ва етакчилик фазилатлари билан клубнинг узоқ муддатли спорт лойиҳасида муҳим фигурага айланган.

Шу сабабли “Реал Мадрид”да Беллингем бўйича позиция қатъий: футболчи “тегиб бўлмас” мақомига эга. Унинг 2029 йил июнига қадар мўлжалланган шартномаси клубнинг мақсадини аниқ ифодалайди. Спорт бошқаруви унинг салоҳияти ҳали тўлиқ очилмаганини ва Мадрид муҳитига мослашуви жуда муваффақиятли кечганини таъкидламоқда.

Англия матбуотига кўра, “Челси” имкон қадар тезроқ ҳужумкор ярим ҳимоячи билан келишувга эришмоқчи. Клуб Коул Палмернинг бошқа клубга ўтиш эҳтимолидан хавотирда. Агар “Манчестер Сити” мураббийлар штабида жиддий ўзгаришлар юз берса, хусусан клубга Энцо Мареска бош мураббий этиб тайинланса, Палмер “Сити”нинг асосий трансфер мақсадига айланиши мумкин.

Агар Палмер клубдан кетадиган бўлса, “Челси” трансфер бозорига чиқишга мажбур бўлади ва айнан шу нуқтада Жуд Беллингем асосий вариантга айланади. Шунга қарамай, бу трансфер молиявий ва спорт нуқтаи назаридан деярли амалга ошмас лойиҳа сифатида баҳоланмоқда.

Манбага кўра, ҳатто рекорд даражадаги таклиф ҳам клубнинг позициясини ўзгартирмайди. Футболчининг ўзи ҳам “Реал Мадрид”ни тарк этиш ниятида эмас. У Испанияда ўзининг энг яхши ўйинларини намойиш этишига ишонади ва йирик совринлар учун кураш имкониятини Англияга қайтишдан устун қўймоқда.

“Қироллик клуби” Беллингем атрофидаги миш-мишларни унинг мақомига хос табиий жараён сифатида қабул қилмоқда. Хулоса аниқ: Жуд Беллингем сотилмайди ва “Реал Мадрид” бу борада ҳеч қандай музокара эшигини очмоқчи эмас.

Маълумот учун, Жуд Беллингем жорий мавсум “Реал Мадрид” сафида барча мусобақалар доирасида 22 та учрашувда майдонга тушиб, 5 та гол ва 4 та голли узатма муаллифига айланган. Transfermarkt портали унинг қийматини 160 миллион еврога баҳолаган.