"Борнмут" марказий ҳимоячиси Маркос Сенеси "Ювентус" эътибор марказида қолмоқда.
28 ёшли футболчининг "гилослар" билан шартномаси ярим йилдан сўнг якунига етади. Уни туринликлар эркин агент сифатида ўз сафига қўшиб олмоқчи. Tuttosport нашрининг хабар беришича, "Ювентус" футболчига "Барселона"дан қизиқиш бўлаётганига қарамай, келишувни амалга ошира олишига ишонмоқда.
Маркос Сенесининг Transfermarkt порталидаги нархи 22 млн еврога баҳоланмоқда. Жорий мавсумда марказий ҳимоячи "Борнмут" сафида барча мусобақаларда 22 та ўйинда майдонга тушиб, 4 та голли узатмани амалга оширди.
