Американинг ESPN портали профессионал бокс бўйича барча вазн тоифаларининг янгиланган рейтингини эълон қилди. Унга кўра, ўзбекистонлик боксчилар — Исроил Мадримов, Шаҳрам Ғиёсов ва Муроджон Аҳмадалиев ўз вазн тоифаларида кучли ўнликдан жой олган.

Биринчи ярим енгил вазн:

Муроджон Аҳмадалиев (14-2) — 3-ўрин

30 ёшли Аҳмадалиев 2025 йилнинг 14 сентябрь куни Япониянинг Нагоя шаҳрида бўлиб ўтган жангда Наоя Иноуэ билан тўқнаш келди. Мутлақ Жаҳон чемпионлиги учун кечган баҳсда ўзбекистонлик спортчи ҳакамларнинг якдил қарорига кўра имкониятни бой берган.

Ярим ўрта вазн:

Шаҳрам Ғиёсов (17-0) — 6-ўрин

Ғиёсов 2025 йилнинг 13 апрель куни аргентиналик Франко Максимилиано Окампога қарши рингга кўтарилган ва 4-раундда рақибини нокаутга учратган эди. Ўзбекистонлик чарм қўлқоп устаси навбатдаги жангини ярим ўрта вазн тоифасида WBA (Жаҳон бокс ассоциацияси) чемпионлик камари соҳиби Роландо Ромерога қарши ўтказиши режалаштирилган.

Супер ярим ўрта вазн:

Исроил Мадримов (10-2) — 5-ўрин

Мадримов сўнгги бор 2025 йилнинг 23 февраль куни Саудия Арабистонининг Ар-Риёд шаҳрида бўлиб ўтган профессионал бокс оқшоми доирасида супер ярим ўрта вазн тоифасида WBC Интерим чемпиони америкалик Вержил Ортис Жуниорга қарши рингга чиқиб, ҳакамлар қарорига кўра имкониятни бой берган эди.

Ўзбекистонлик собиқ Жаҳон чемпиони навбатдаги жангини 2026 йил 25 январь куни АҚШнинг Лас Вегас шаҳрида жойлашган “Фонтаинеблеау” мажмуасида ташкил этиладиган бокс оқшомида Доминикан Республикаси вакили Луис Давид Салазарга қарши ўтказади.

Шунингдек, Олександр Усик (Украина), Наоя Иноуэ (Япония), Дмитри Бивол (Россия), Сауль Алварес (Мексика), Вержил Ортис, Девин Ҳейни, Теофимо Лопес ва Шакур Стивенсон (барчаси АҚШ) ўз вазн тоифаларида 1-ўринни эгаллаган.