"Локомотив" - "Краснодар" ўйинида гол уришга муваффақ бўлган Виталий Денисов "Газета.ру"га интервью берди.

"Бу баҳсни бекорга интизорлик билан кутмагандик — дейди учрашув қаҳрамонига айланган Денисов. — Бошида бироз шубҳалангандик, лекин майдон чими яхши ҳолатда экан. Бундай об-ҳаво учун (ўйиндан олдин кучли ёмғир ёғиб ўтди — Std.uz изоҳи) майдоннинг ҳолатини аъло даражада деса ҳам бўлади. Клуб ишчилари ўз олдиларига қўйилган вазифани уддалашди ва ноқулай об-ҳаво шароитида майдонни ўйинга тайёрлай олишди. Кутиш пайтида нима билан машғул бўлдик? Кимдир мусиқа тинглади, кимдир телефонини ўйнади, бошқалар эса ўзаро суҳбатлашишди. Мен эса барчаси билан оз-оздан машғул бўлдим".

— Виталий, Россиядаги дебют голингиз билан табриклаймиз. Украинадаги гол урган ўйинларингизни эслайсизми?
— Ҳа, "Черноморец" ва "Таврия" дарвозабонларини хафа қилгандим. Барча голларни ўйиндан урганман. Тўғрисини айтсам, Самедов ўзи зарба берса керак деб ўйлагандим. Саша зарба бериш учун қулай вазиятда — дарвоза рўпарасидан жой олганди. Лекин у менга тўпни етказишга қарор қилди. Менга эса фақат ҳужумни якунлаш қолганди, холос.

— Ушбу ўйинда олдингизга қанотдан ҳужумга қўшилиш ва вазиятни кескинлаштириш вазифаси қўйилганмиди?
— "Локомотив"да олдимга ҳамиша жамоани ҳужумда қўллаб-қувватлаш вазифаси қўйилади. Шунингдек, Рома Павлюченко ўйиндан бироз олдин бугун гол уришимни айтганди (кулади).

— Демак, "уйқудаги гигант" гол борасида "сукут" сақламоқда, лекин Денисовга футбол омадини чорламоқда?
— Рома бугун майдонга чиқмаган бўлса-да, учрашувлар давомида менга нисбатан унда гол уриш учун имкониятлар кўпроқ бўлади. Ишончим комил, Павлюченко ҳали голлар уради!

— Сизга омад келтирган жамоадошларингизга голни "ювиб" беришингиз керак. Балки уларни караокега таклиф қиларсиз?
— Караокени билмадиму, лекин нимадир уюштирамиз. Байрамни қай тарзда ташкиллаштиришни жамоанинг ўзи ҳал қилсин.

— Ҳозирча эса Россиядаги илк голингизни кимга бағишлайсиз?
— Биринчи навбатда, ўз онамга бағишлайман... (қисқа сукут) ва отамга. Шунингдек, акамга... Ва албатта, аёлимга (кулади).

— Мухлислар сизни Голливуд блокбастери "Тор"га ўхшатишади, аммо бугунги ўйиндан кейин сизга "ёмғир одами" тахаллусини берамиз, шекилли.
— Мухлислар шуни ўйлаб топишган бўлса, демак, бу уларнинг қарори. Мен улар билан баҳслашмайман. "Тор"ни бир неча марта кўрганман. Соч борасида ўхшашлигим бор.

— Яқин орада хет-трикка эришишингиз ҳам мумкинми?
— Насиб қилса. Агар 3та гол урсам, бундан фақат хурсанд бўламан.

— "Локо" дарвозасига белгиланган пенальти борасида нима дея оласиз?
— Менимча, пенальти умуман йўқ эди. Тарасов тўпга қоқилиб кетди. Вазият менинг кўз олдимда содир бўлди.

— Шу пайтгача "Локомотив" биттадан ғалаба ("Волга), дуранг ("Анжи") ва мағлубият (ЦСКА) қайд этганди. Замонавий "Локомотив"ни қандай тасаввур қилсак бўлади?
— Келинг, шошмайлик ва кейинги ўйинни кутамиз. Бугун биз ғалаба қозондик. Шунинг учун хотиржам дам олиш ва ғалабадан роҳатланишни истайман.