Испания Қироллик Футбол Федерацияси "Барcелона" ва "Реал Мадрид" ўртасидаги Суперкубок финалидан сўнг (3:2) ҳакамларнинг аудио ёзувларини эълон қилди ва учрашувдаги энг кўп баҳс-мунозарага сабаб бўлган лаҳзаларга аниқлик киритди.

Бош ҳакам Хосе Луис Мунуэра Монтеро биринчи бўлимга қўшиб берилган вақт нега узоқ бўлганини шундай изоҳлади:

“Ҳар бир гол бир дақиқа қўшади".

У бир нечта голлар сабаб дастлаб белгиланган қўшимча вақтдан ошиб кетилганини ва бу ҳақда иккала жамоа захира ўриндиғини олдиндан огоҳлантирганини айтган.

Аудио ёзувлар, шунингдек, Мунуэра ўйиндан олдин сардорлар Френки де Йонг ва Федерико Вальвердега берган кўрсатмаларини ҳам очиб берди — у ҳакам билан яккама-якка, ҳурмат доирасида мулоқот қилишни талаб қилган. Ўйин давомида эса ҳимоячиларни жарима майдонида ушлаб қолишлар тўғридан-тўғри пенальти келтириб чиқаришини бир неча бор огоҳлантирган.

Энг баҳсли вазиятлардан бири — жарима майдони яқинида Ламин Ямалга қарши қўпол ҳаракат эпизоди бўлди. Мунуэра бу ерда ўйинни тўхтатмасдан давом эттиришини ҳимоя қилиб, Педрига:
“Бу ҳужум учун аниқ имконият яратди,” — деган.

VAR эса бу вазиятда оёқ босиш бўлмаганини тасдиқлаган.

Энг ҳал қилувчи лаҳза эса Френки де Йонгнинг Килиан Мбаппега қарши юқори кўтарилган оёқ билан қилган ҳаракатидан сўнг қизил карточка олиши бўлди. VAR ҳакамни болдирга юқори контакт бўлганини кўрсатиб, майдондан четлатишга чақирди.

Норозиликларга қарамай, Мунуэра қарорини қатъий айтди: “Қизил карточка тасдиқланди. Френки, майдонни тарк эт".

Баҳсда каталонияликлар 3:2 ҳисобида ғалаба қозониб, 16-бор Суперкубокни қўлга киритди.