Мадриднинг "Реал" клуби Жозе Моуриньони қайтариш имкониятини кўриб чиқмоқда. Португалиялик айни дамда ўз ватанида ишламоқда ва у ерда "Бенфика"ни бошқармоқда.

Таниқли журналист Руди Галеттининг хабар беришича, лиссабонликлар раҳбарияти "Реал" Моуриньога мурожаат қилса, унинг кетишига қаршилик қилмайди. Улар "special one" ўрнига Рубен Аморимни олиб келиши мумкин. "Манчестер Юнайтед"нинг собиқ устози ҳамюртининг ўрнига асосий номзодлардан бири сифатида кўрилмоқда.

Жозе Моуриньо 2025 йилнинг сентябридан буён "Бенфика"да ишлаб келмоқда. 62 ёшли мутахассиснинг шартномаси 2027 йилгача мўлжалланган.