Ҳужумчи Родриго шанба куни Испания чемпионатининг "Леванте"га қарши ўйинида "Реал"га ёрдам бера олмайди. Бу ҳақда "қаймоқранглилар" бош мураббийи Альваро Арбелоа матбуот анжуманида айтиб ўтди.
"Эртага Родриго бўлмайди. У ўтган ҳафта жуда оғир юкламадан кейин тикланмоқда. Уни имкон қадар тезроқ қайтаришга умид қиламиз. Биз ҳаммамиз Родригонинг фавқулодда даражаси ва у бизга қанча ёрқин лаҳзаларни тақдим этганини биламиз. Сўнгги ойларда у яна ўзининг энг яхши даражасига чиқди. Унинг тезроқ соғайиб кетишини тилаймиз," - деди Арбелоа журналистларга.
"Реал" - "Леванте" учрашуви 17 январь куни Тошкент вақти билан соат 18:00да бошланади.
