Амстердамнинг “Аякс” клуби Йохан Кройфнинг ўғли Жорди Кройфни клубнинг техник директори лавозимига тайинлади. Кройф ўз вазифаларини 2026 йил 1 февралдан бошлаб бажаради, тузилган шартнома эса 2028 йил июнь ойигача мўлжалланган. Бу ҳақда клубнинг расмий сайти хабар берди.

“Бу мен учун алоҳида воқеа — бу ерда бўлиш ва шартнома имзолаш. Отам номи билан аталган стадионда, болалик йилларимдан ҳаётимда муҳим ўрин тутган клубда ишлаш мен учун жуда катта аҳамиятга эга. Бу ҳолатнинг ўзиёқ мен ва оилам учун қанчалик муҳим эканини кўрсатади. Февраль ойидан бошлаб ўзимни тўлиқ “Аякс”га бағишлайман. Бу катта масъулият ва фахр ҳиссини уйғотади. Клуб раҳбариятига билдирилган ишонч учун миннатдорлик билдираман. ‘Аякс’ бой тарихга эга ноёб клуб, унинг тарихида янги муваффақиятли саҳифа очиш учун барча имкониятимни ишга соламан”, деди Кройфф тайинлов борасида фикр билдирар экан.

Жорди Кройфф фаолиятининг бир қисмини “Аякс” ёшлар академиясида ўтказган, кейинчалик эса Испанияда фаолиятини давом эттириб, “Барселона” билан шартнома имзолаган. Профессионал футболчи сифатида у “Барселона” ва “Манчестер Юнайтед” клубларида тўп тепган, шунингдек, Нидерландия терма жамоаси сафида 9 та учрашувда майдонга тушган.

Футболчилик фаолиятини якунлагач, Кройф халқаро футбол тизимида турли лавозимларда ишлаган. Жумладан, у “Маккаби” ва “Барселона” клубларида спорт директори лавозимида фаолият юритган. У тайинловга қадар Индонезия футбол ассоциациясида маслаҳатчи бўлган.

Маълумот учун, “Аякс” жорий мавсум Нидерландия чемпионатида 19-турдан сўнг 9 та ғалаба, 7 та дуранг ва 3 та мағлубият қайд этган ҳолда турнир жадвалида 3-ўринни эгаллаб турибди.