Amsterdamning “Ayaks” klubi Yoxan Kroyfning o‘g‘li Jordi Kroyfni klubning texnik direktori lavozimiga tayinladi. Kroyf o‘z vazifalarini 2026 yil 1 fevraldan boshlab bajaradi, tuzilgan shartnoma esa 2028 yil iyun oyigacha mo‘ljallangan. Bu haqda klubning rasmiy sayti xabar berdi.

“Bu men uchun alohida voqea — bu yerda bo‘lish va shartnoma imzolash. Otam nomi bilan atalgan stadionda, bolalik yillarimdan hayotimda muhim o‘rin tutgan klubda ishlash men uchun juda katta ahamiyatga ega. Bu holatning o‘ziyoq men va oilam uchun qanchalik muhim ekanini ko‘rsatadi. Fevral oyidan boshlab o‘zimni to‘liq “Ayaks”ga bag‘ishlayman. Bu katta mas’uliyat va faxr hissini uyg‘otadi. Klub rahbariyatiga bildirilgan ishonch uchun minnatdorlik bildiraman. ‘Ayaks’ boy tarixga ega noyob klub, uning tarixida yangi muvaffaqiyatli sahifa ochish uchun barcha imkoniyatimni ishga solaman”, dedi Kroyff tayinlov borasida fikr bildirar ekan.

Jordi Kroyff faoliyatining bir qismini “Ayaks” yoshlar akademiyasida o‘tkazgan, keyinchalik esa Ispaniyada faoliyatini davom ettirib, “Barselona” bilan shartnoma imzolagan. Professional futbolchi sifatida u “Barselona” va “Manchester Yunayted” klublarida to‘p tepgan, shuningdek, Niderlandiya terma jamoasi safida 9 ta uchrashuvda maydonga tushgan.

Futbolchilik faoliyatini yakunlagach, Kroyf xalqaro futbol tizimida turli lavozimlarda ishlagan. Jumladan, u “Makkabi” va “Barselona” klublarida sport direktori lavozimida faoliyat yuritgan. U tayinlovga qadar Indoneziya futbol assosiasiyasida maslahatchi bo‘lgan.

Ma’lumot uchun, “Ayaks” joriy mavsum Niderlandiya chempionatida 19-turdan so‘ng 9 ta g‘alaba, 7 ta durang va 3 ta mag‘lubiyat qayd etgan holda turnir jadvalida 3-o‘rinni egallab turibdi.