"Милан" бош мураббийи Массимилиано Аллегри А Сериянинг 21-турида жамоаси "Лечче" қаршилигини қандай енгиб ўтгани ҳақида фикр билдирди.

«Россонерилар» ўз майдонида 1:0 ҳисобида минимал ғалабага эришди. Учрашувдаги ягона голни Никлас Фюллькруг киритди.

Аллегрининг айтишича, «Лечче» рақибларини тез-тез офсайдга тушириш билан ажралиб туради ва «Милан» ҳужумчилари ҳам кўп ҳолларда шундай вазиятга тушиб қолган.

«Статистикани кўриб чиқдим: жамоа ўтказиб юборган голларнинг деярли ярмини сўнгги 15 дақиқада қабул қилган. Бу жамоа яхши ишлаётганини, бироқ охирига келиб чарчашини англатади», — деди Аллегри Football Italia нашрига берган интервьюсида.

Шунингдек, «Милан» устози учрашув давомида бешта ўзгариш қилиш имконияти унга катта ёрдам берганини ҳам қўшимча қилди.