"Манчестер Сити" ҳимоячиси Марк Гехи клубга ўтганидан кейинги ҳис-туйғулари билан ўртоқлашди.
Маълумки, "шаҳарликлар" футболчини "Кристал Пэлас"дан 20 миллион фунт стерлинг ва бонуслар эвазига сотиб олди.
"Бундай улкан клубга ўтиш ва шу ерда ўйнаш мен учун катта шараф. Мен доим яхшироқ бўлиш истаги билан яшайман, бу йўлда тинмай ҳаракат қиламан. Бу клуб эса айнан шу мақсад учун идеал жой.
Мен "Ман Сити" ва унинг мухлислари ҳақида жуда кўп яхши гапларни эшитганман. Бу ерда ўсиш ва ривожланиш учун жуда қулай муҳит бор. Умид қиламанки, шу ердаги ҳар бир инсонга ёрдам бериш учун қўлимдан келган барча ишни қила оламан", — деди Гехи.
"Манчестер Сити" ютуқлари ҳақида
"Бу мутлақ устунлик эди, клуб нималарга эришганини кузатиш жуда ёқимли бўлди. Клуб доимий равишда ўсишни хоҳлайди ва шу йўлда интилади — бу ажойиб. Мен эса фақат ёрдам беришни, ўз ҳиссамни қўшишни ва клуб қай даражагача бора олишини кўришни истайман", — дея қўшимча қилди Марк Гехи.
