"Реал" ҳужумчиси Килиан Мбаппе Чемпионлар лигаси 7-тури доирасида "Монако"га қарши ўйиндан кутилмаларини билдирди.

Унинг таъкидлашича, рақибнинг ҳозирги ҳолатига ортиқча эътибор қаратиш шарт эмас.

"Ҳозир "Монако" энг яхши ҳолатда эмас, аммо бу жамоа ҳар доим юқори даражага чиқишни билади. Биз агрессив ҳаракат қилишимиз керак, чунки ғалаба қозонишни ва саккизликдан жой олишни истаяпмиз", — дея француз ҳужумчисининг сўзларини УЕФА матбуот хизмати келтирди.

Шунингдек, Мбаппе "Монако"даги фаолиятини ҳам эслаб ўтди. Унинг сўзларига кўра, форвард клубдан доим миннатдор бўлиб қолади, чунки айнан "Монако" сафидаги ўйинларисиз у бугунги ютуқларга эриша олмас эди.