"Барселона" яримҳимоячиси Фермин Лопес қишки трансфер ойнасида жамоани тарк этишни режалаштирмаяпти. Бу ҳақда журналист Адриан Санчес хабар бермоқда.
Манбага кўра, Лопес Лондоннинг "Челси" ва бошқа гранд клубларидан қизиқиш бўлаётганига қарамай, бор эътиборини "кўк-анорранглилар" сафида ўйнашга қаратган.
Фермин Лопес "Барселона" тарбияланувчиси ҳисобланади. Жорий мавсумда 22 ёшли ярим ҳимоячи барча мусобақаларни ҳисобга олган ҳолда 23 та ўйинда майдонга тушиб, 8 та гол урди ва 10 та голли узатмани амалга оширди.
Лопеснинг "Барселона" билан шартномаси 2029 йилгача мўлжалланган. Transfermarkt экспертлари футболчининг нархини 70 миллион еврога баҳоламоқда.
