Англиянинг "Челси" клуби бош мураббийи Лиам Росеньор Чемпионлар лигаси умумий босқичидан ўрин олган Кипрнинг "Пафос" клубига қарши ўйиндаги ғалаба ҳақида фикр билдирди. Унда "Челси" 1:0 ҳисобида ғалаба қозонди. Ягона гол 78-дақиқада ярим ҳимоячи Мойсес Кайседо томонидан киритилди.
"Менимча, "Пафос" ҳимояда жуда яхши ўйнади. Футболни турлича ўйнаш мумкин. Рақиб жуда паст блокда ҳаракат қилди, унга қарши ҳар доим қийин, аммо менга жамоамнинг кайфияти ёқди - биз олдинга боришда давом этдик ва охир-оқибат ўз имкониятимиздан фойдаландик. Бугун бу биз учун жиддий синов бўлди ва мен натижадан мамнунман", - дея Росеньорнинг сўзларини келтиради "Челси" расмий сайти.
