Машҳур MMA жангчиси Конор Макгрегор Гренландия масаласига муносабат билдириб, агар ҳудуд сотувга қўйилса, уни сотиб олиш имкониятини кўриб чиқишга тайёр эканлигини айтди. Бу ҳақда Irish Mirror нашри хабар берди.

Аввалроқ АҚШ президенти Дональд Трамп Дания қироллиги таркибидаги автоном ҳудуд — Гренландия устидан назоратни қўлга олиш исташи ҳақида фикр билдирган эди. Унинг таъкидлашича, бу АҚШ хавфсизлиги нуқтайи назаридан муҳим ҳисобланади. Трампнинг бу фикрлари халқаро миқёсда кескин эътирозларга сабаб бўлганига қарамай, у мазкур масалада қатъий позициясини сақлаб қолмоқда.

Шу ҳафта Трампнинг яқин тарафдорларидан бири бўлган Конор Макгрегор ҳам ушбу мавзуга қўшилиб, Гренландия сотувга чиқарилса, уни шахсан сотиб олиш эҳтимолини истисно этмади. Бу Макгрегор учун сиёсатдаги илк баёнот эмас. У узоқ вақтдан буён Трампни очиқ қўллаб-қувватлаб келади ҳамда ижтимоий тармоқларда Трампнинг иммиграцияга қарши қарашларни фаол тарғиб қилади. Ўтган йили у Ирландия президентлик сайловида иштирок этишга уринган, бироқ конституциявий чекловлар сабаб қилиб, пойгадан эрта чиққанди.

Маълумот учун, Конор Макгрегор 2021 йил июлдан буён жанг ўтказмаяпти. У охирги марта UFC 264 турнирида қатнашган бўлиб, биринчи раундда оёғидаги жароҳат туфайли техник нокаут эвазига Дастин Порьега ютқазганди. Конор профессионал фаолияти давомида 28 та жанг ўтказган бўлиб, 22 ғалаба ва 6 мағлубият қайд этган.