"Барселона" дарвозабони Марк-Андре тер Штеген яқинда ижара асосида "Жирона" сафига қўшилди. Германиялик футболчи жорий мавсум якунига қадар "оқ-қизиллар" шарафини ҳимоя қилади.
33 ёшли дарвозабон клубни тарк этишдан олдин айнан "Жирона"да тажриба орттириб, фаолиятини муваффақиятли бошлаган ҳимоячи Эрик Гарсия билан маслаҳатлашганини тан олди.
"Эрик клуб ва ўша давр ҳақида жуда илиқ фикрлар билдирди. У менга: "Жирона"да сени тез қабул қилишади, у ерда оилавий муҳит бор", дерди. Энди у "Барселона"нинг асосий ўйинчиси, бу билан уни табриклаш керак. Унинг "Жирона"даги ижараси бошқаларга ўрнак бўлиши мумкин", - деди тер Штеген матбуот анжуманида.
26 январь куни Мичель жамоаси Ла Лига 21-туридан ўрин олган "Хетафе"ни ўз майдонида қабул қилади.
