Мадриднинг "Реал" клуби ҳужумчиси Килиан Мбаппе яна гол уриб, жамоасининг ғалабасига катта ҳисса қўшди. Шанба куни 27 ёшли футболчи "Вильярреал"га қарши учрашувда дублни расмийлаштирди ва беллашув "қаймоқранглилар"нинг ғалабаси билан якунланди (2:0).
Қизиғи шундаки, Мбаппе камида бир марта рақиб дарвозасини ишғол қилган 21 та ўйиннинг 19 тасида "Реал" ғалаба қозонган. Франциялик юлдуз гол урмаган 11 та беллашувда эса жамоа бор-йўғи тўрт марта ютган, икки бор дуранг ўйнаган ва беш марта мағлуб бўлган.
"Реал" Ла Лига турнир жадвалида 51 очко билан пешқадам, аммо икки очкога ортда қолаётган "Барселона" 21-турдаги учрашувини ҳали ўтказмаган.
Килиан Мбаппе чемпионат тўпурарлари пойгасида етакчилик қилмоқда — у 20 та ўйинда 21 та гол урган.
