"Барселона" президенти Жоан Лапорта Ла Лига доирасидаги "Реал Овьедо"га (3:0) қарши ўйинда "Камп Ноу" стадионининг айрим ҳудудлари сув остида қолгани ҳақида гапирди.
Хусусан, ёмғир туфайли журналистлар зонаси сув остида қолди. У энг заиф бўлиб чиқди, чунки бу ҳудудни ҳимоя қиладиган тўлиқ томга эга эмас.
"Ёмғир ёғса, шалаббо бўламиз деб ўйлагандик, чунки том ҳали битмаган. Ҳамма қатори ивиб кетамиз, деб ўйлагандим. Ёмғир ҳаммамизни ғафлатда қолдирди. Соябон олишни режалаштирмаган эдим.
Стадион қурилмоқда. Керакли нарсаларни тузатамиз.
Ҳар куни бу ерга келганимизда қандайдир янгилик қилинаётганини кўрамиз. Учинчи ярус ишлари ҳам, ички пардозлаш ишлари ҳам яхши кетмоқда. Ҳаммаси режа бўйича кетмоқда", - деди Жоан Лапорта.
