"Бавария" бош мураббийи Венсан Компани Мадриднинг "Атлетико" клуби ярим ҳимоячи Леон Горецкага қизиқиш билдираётгани ҳақидаги миш-мишларга изоҳ берди.
"Трансферлар бўйича қарор фақат мураббий томонидан қабул қилинмайди. Ҳар бир аниқ вазиятда раҳбарият билан музокаралар олиб борилади. Ўтган 48 соат давомида мен фақат ПСВ ҳақида гапирдим, жамоага ўтиши ёки кетиши мумкин бўлган футболчилар ҳақида эмас. Шунинг учун мен бу ҳақида маълумот бера олмайман," - деди Компани матбуот анжуманида.
Леон Горецка 2018 йилда "Бохум"дан эркин агент сифатида "Бавария"га ўтган эди. Унинг шартномаси 2026 йилнинг 30 июнига қадар имзоланган. Жорий мавсумда ярим ҳимоячи мюнхенликлар сафида 28 та ўйинда майдонга тушиб, битта гол урган.
