Муҳаммад Салоҳ ёзда «Ливерпуль»ни тарк этиши деярли аниқ, шу боис мерсисайдликлар мисрлик юлдузнинг ўрнини босадиган юқори савияли футболчини изламоқда. Indykaila News хабар беришича, «қизиллар» «Бавария» вингери Майкл Олисега жиддий эътибор қаратмоқда.

Манбага кўра, «Ливерпуль» ёзда катта таклиф билан чиқиш эҳтимолини кўриб чиқмоқда. Бироқ Майклни олиб келиш имконияти тўғридан-тўғри Салоҳнинг кетишига боғлиқ — бу маошлар тузилмаси билан изоҳланади.

Француз футболчиси «Бавария» сафида ажойиб мавсум ўтказмоқда: у 31 та ўйинда 13 та гол урди ва 22 та голли пас берди. Transfermarkt портали Олисени 130 миллион еврога баҳоламоқда.

Олисе ёшлар жамоалари даражасида «Арсенал», «Челси», «Манчестер Сити» ва «Рединг» тизимларидан ўйнаган. Катталар футболида эса «Бавария»га ўтишидан олдин Англияда «Рединг» ва «Кристал Пэлас» клублари сафида тўп сурган.