“Башакшеҳир” сафида тўп сураётган ўзбекистонлик футболчилар — Элдор Шомуродов ҳамда Аббосбек Файзуллаев Туркия Суперлигасининг 20-тури доирасида “Ризеспор”га қарши баҳсда майдонга тушди (2:2). Шомуродов учрашувни тўлиқ ўтказган бўлса, Файзуллаев 63-дақиқада захирага олинди.

Sofascore портали “Башакшеҳир”нинг биринчи голига муаллифлик қилган Элдор Шомуродовнинг ҳаракатларини 7,3 балл билан баҳолади. Аббосбек Файзуллаев эса 6,7 баллга лойиқ кўрилди.

Шомуродов ўйин давомида 36 марта тўпга тегинди. У жами 25 та узатма амалга оширган бўлиб, шулардан 18 таси аниқ манзилга етиб борди (72 фоиз). Шунингдек, Элдор “Ризеспор” дарвозасига бир марта аниқ зарба йўллади. Унинг кутилган голлар (хГ) кўрсаткичи 0,56ни ташкил этди.

Аббосбек Файзуллаев учрашув давомида 33 марта тўпга тегинди. У 63 дақиқа ичида 18 та узатма амалга ошириб, уларнинг 16 таси аниқ манзилга етиб борди (89 фоиз). Файзуллаев икки марта зарба йўллади, улардан биттаси дарвозага аниқ етиб борди. Шунингдек, у майдонда 8 марта тўп учун кураш олиб бориб, 4 ҳолатда ғалаба қозонди. Унга нисбатан рақиб футболчилар икки марта қоида бузди.

73-дақиқада захирадан майдонга тушиб, “Башакшеҳир”нинг иккинчи голига голли узатма берган Якуб Кализински учрашувнинг энг яхши футболчиси деб топилди. Sofascore полшалик футболчининг ҳаракатларини 7,9 балл билан баҳолади. Иккинчи гол муаллифи Бергют Озгюр эса 7,4 баллга лойиқ кўрилди.

Маълумот учун, айни пайтда “Башакшеҳир” Туркия чемпионатининг 20-туридан сўнг 30 очко билан турнир жадвалида 6-ўринни эгаллаб турибди. “Ризеспор” эса 20 очко билан 11-ўриндан жой олган.