"Атлетико" форварди Александер Сёрлот Испания чемпионатининг 22-туридан ўрин олган "Леванте"га қарши ўйинда жароҳат олиб, майдонни замбилда тарк этди.
Воқеа Валенсиядаги ўйиннинг 24-дақиқасида содир бўлган. Норвегиялик футболчи ва "Леванте" ҳимоячиси Матиас Морено тўп учун курашда ўзаро тўқнашиб кетди. Тиббий ёрдам кўрсатилгандан сўнг, Сёрлот майдондан замбил ёрдамида олиб кетилди. Унинг ўрнини Хулиан Альварес эгаллади. Морено ҳам учрашувни давом эттира олмади.
Жорий мавсумда 30 ёшли норвегиялик ҳужумчи "Атлетико" сафида барча мусобақаларда 29 та ўйинда майдонга тушиб, 10 та гол урган.
