«Манчестер Юнайтед» бош мураббийи Майкл Кэррик АПЛ 24-тури доирасида «Фулхэм»га қарши баҳсда (3:2) жамоа ҳужумчиси Беньямин Шешконинг ўйинига баҳо берди.
Англиялик мутахассис словениялик футболчи учун жуда хурсанд эканини таъкидлади. Шешко учрашувнинг сўнгги дақиқаларида гол уриб, «қизил иблислар»га кетма-кет учинчи ғалабани олиб келди.
«Бу барчамиз учун муҳим лаҳза, айниқса унинг ўзи учун. У бунга лойиқ. Мен келганимдан бери у ажойиб ўйнамоқда, бу ҳиссиётни у узоқ вақт эслаб юради», — дея Кэррикнинг сўзларини келтиради Sky Sports.
Жорий мавсумда ёзда «Манчестер Юнайтед»га келиб қўшилган Шешко 21 та ўйин ўтказди. 22 ёшли ҳужумчининг ҳисобида 6 та гол ва 1 та голли узатма бор.
