"Альбасете" ҳужумчиси Хефте Бетанкор жамоаси "Реал"дан кейин "Барселона"ни Испания кубогидан нима эвазига мағлуб этиши мумкинлигини айтди.
32 ёшли футболчининг 1/8 финалдаги дубли "Альбасете"га "қаймоқранглилар" устидан кутилмаган ғалабани келтирди (3:2). Сегунда вакили чорак финалда бошқа бир "гигант" - "Барселона" билан тўқнаш келади.
"Биз мукаммалроқ ўйнашимиз ва "Барса"нинг омадли куни бўлмаслигига умид қилишимиз керак. Ана шунда имкониятимиз бўлади. Аммо омадсиз кунларда ҳам "Барселона" таркибида ажойиб футболчилар бор. Агар аввалгидек бирдамликда ҳаракат қилсак, унда имкониятлар пайдо бўлади," - дея Бетанкорнинг сўзларини келтиради Mundo Deportivo.
"Альбасете"нинг "Барселона"га қарши ўйини 3 февраль, сешанба куни бўлиб ўтади.
