«Барселона» устози Ханс-Дитер Флик Испания Кубоги чорак финалида «Альбасете»га қарши кечган баҳсдаги (2:1) Рональд Араухонинг голи ҳақида ўз фикрларини билдирди. Уругвайлик марказий ҳимоячи 56-дақиқада гол уриб, ҳисобни 2:0 кўринишига келтирди. Ўйин якунида рақиблар битта жавоб тўпини киритишган бўлса-да, меҳмонлар устунликни сақлаб қолишди ва ярим финалга йўл олишди.

«Мен Араухо учун жуда хурсандман. Унинг бугун гол ургани ажойиб бўлди. Бу унга жуда зарур эди. Рональднинг узоқ вақтлик танаффусдан кейин майдонга қайтиши — бу аста-секинлик билан кечадиган жараён. Мен унга ўзига бўлган ишончни қайта тиклашда ва оптимал формага кириб олишида ёрдам беришга ҳаракат қиляпман. Ўйин охирида у чарчаб қолди, лекин бу табиий ҳол», – деди Флик ўйиндан кейинги интервьюсида.

Эслатиб ўтамиз, Рональд Араухо психологик қийинчиликлар сабабли ноябрь ойидан январгача майдонга тушмаётган эди.