«Арсенал» ярим ҳимоячиси Деклан Райс Англия лига кубоги ярим финалидаги ғалабадан сўнг «Челси» ҳақидаги фикрлари билан ўртоқлашди.

«Тўпчилар» ўз майдонларида бўлиб ўтган жавоб учрашувида 97-дақиқада киритилган гол эвазига 1:0 ҳисобида ғалаба қозонишди. Январь ойида ўтказилган дастлабки ўйинда ҳам «Арсенал» битта тўп фарқи билан (3:2) зафар қучган эди.

«Биз «Челси»га муносиб баҳо беришимиз керак. Янги мураббий [Лиам Росеньор] келганидан бери жамоа ажойиб натижалар кўрсатмоқда. Бошқа куни улар албатта гол уришган бўларди», — дея Деклан Райснинг сўзларини келтирмоқда The Touchline.

Бугун Лига кубогининг иккинчи ярим финали доирасида «Манчестер Сити» ва «Ньюкасл» ўртасидаги баҳс бўлиб ўтади. Биринчи ўйинда «шаҳарликлар» сафарда «қарғалар»дан устун келишган (2:0).