Франциянинг «Страсбург» клуби қишки трансфер ойнасида бир нечта футболчиларини сотган бўлса-да, ҳужумчи Хоакин Паничеллини жамоада олиб қолишга қарор қилди. Alsa Sports нашрининг хабарига кўра, клуб футболчи учун берилган 50 миллион евролик таклифга рад жавобини берган.

Бундан ташқари, «Страсбург» Гела Дуэ ва Диего Морейраларни 45 миллион еврога сотиш борасидаги таклифларни ҳам қабул қилмаган. Эслатиб ўтамиз, Паничеллига аввалроқ Англиянинг «Кристал Пэлас» клуби жиддий қизиқиш билдирган эди.

Жорий мавсумда 23 ёшли Паничелли 28 та ўйинда майдонга тушиб, 13 та гол урди ва 2 та голли узатмани амалга оширди. Унинг клуб билан амалдаги шартномаси 2030 йилнинг ёзига қадар мўлжалланган.