Каталониянинг "Барселона" клуби ўзининг кўп йиллик техник ҳамкори — Nike компанияси билан музокаралардаги қийинчиликлар сабабли 4 миллион евро маблағни беҳуда сарфлади.
Дастлаб "Барса" ушбу мавсумни техник ҳомийсиз бошлаши ёки ўтказиши тахмин қилинган эди, чунки раҳбарият бошқа бир гигант — Puma билан келишишга уриниб кўрганди. Шу боис, олдиндан Nike логотипи туширилмаган бир неча ўн минглаб янги намунадаги футболкалар ишлаб чиқарилган. Бу нафақат футбол жамоаси, балки клуб бренди остидаги баскетбол ва волейбол жамоалари учун ҳам мўлжалланган эди.
Бироқ, якунда Nike билан келишувга эришилди ва бу футболкалар кераксиз бўлиб қолди. Ҳомий логотипи бўлмаган либосларни сотиш шартнома шартларини бузиш ҳисобланади. Бундай хатолик клубга беҳуда сарфланган 4 миллион евродан кўра анча каттароқ зарар келтириши мумкин эди.
