Чоршанба куни "Манчестер Сити" ва "Ньюкасл" клублари Лига кубоги ярим финал жавоб учрашувини ўтказди. Учрашув "шаҳарликлар"нинг 3:1 ҳисобидаги ғалабаси билан якунланди. Хосеп Гвардиола жамоаси умумий 5:1 ҳисобида ғалаба қозониб, финалга йўл олди ва у ерда "Арсенал" билан ўйнайди.
Бугунги баҳс якунлангач, испаниялик мураббий Сандро Тонали билан суҳбатлашди. Журналистлар мураббийдан ушбу эпизодга ойдинлик киритишни сўрашди.
"Итальян тилини мукаммал биламан, шунинг учун Тонали билан бемалол гаплаша оламан. Брешиялик ажойиб умумий дўстимиз бор - Эдоардо Пиовани. Биз Сандро билан доим гаплашиб турамиз, мен унинг отасини анчадан бери биламан. Унинг "Милан"даги тажрибаси, мухлислар ва "Ньюкасл"даги бахти ҳақида гаплашдик. Тонали - топ-футболчи", - дея Гвардиоланинг сўзларини келтиради The Touchline.
Италиялик футболчи 2023 йилнинг ёзида "Милан"дан "Ньюкасл"га ўтганди.
