Chorshanba kuni "Manchester Siti" va "Nyukasl" klublari Liga kubogi yarim final javob uchrashuvini o‘tkazdi. Uchrashuv "shaharliklar"ning 3:1 hisobidagi g‘alabasi bilan yakunlandi. Xosep Gvardiola jamoasi umumiy 5:1 hisobida g‘alaba qozonib, finalga yo‘l oldi va u yerda "Arsenal" bilan o‘ynaydi.
Bugungi bahs yakunlangach, ispaniyalik murabbiy Sandro Tonali bilan suhbatlashdi. Jurnalistlar murabbiydan ushbu epizodga oydinlik kiritishni so‘rashdi.
"Italyan tilini mukammal bilaman, shuning uchun Tonali bilan bemalol gaplasha olaman. Breshiyalik ajoyib umumiy do‘stimiz bor - Edoardo Piovani. Biz Sandro bilan doim gaplashib turamiz, men uning otasini anchadan beri bilaman. Uning "Milan"dagi tajribasi, muxlislar va "Nyukasl"dagi baxti haqida gaplashdik. Tonali - top-futbolchi", - deya Gvardiolaning so‘zlarini keltiradi The Touchline.
Italiyalik futbolchi 2023 yilning yozida "Milan"dan "Nyukasl"ga o‘tgandi.













