Лондоннинг «Арсенал» клуби ярим ҳимоячиси Мартин Субименди жамоадоши Микель Меринонинг жароҳати ҳақида фикр билдирди.

29 ёшли испаниялик футболчи оёқ кафти суяги синиши туфайли мавсумнинг қолган қисмини ўтказиб юбориши кутилмоқда. Ярим ҳимоячига жарроҳлик амалиёти зарур.

«Микелга оғир. У ҳақиқий профессионал, шунинг учун ҳам ўз соғлиғига эътибор беради, ҳам клуб ҳақида қайғуради. Биламан, бундан энг кўп Меринонинг ўзи азоб чекмоқда, лекин бу бутун жамоа учун ҳам жиддий зарба бўлди. У Жаҳон чемпионатигача тикланиш ва Испания терма жамоасига ёрдам бериш учун қўлидан келган барча ишни қилади. Агар у бунга улгура олмаса, жуда афсусланарли бўлади», – деди Субименди ўз интервьюсида.

Микель Мерино жорий мавсумда «Арсенал» сафида 33 та ўйинда майдонга тушиб, олтита гол ва учта голли узатмага муаллифлик қилган эди.