Англия Премьер-лигасида Лондоннинг «Челси» клуби сафидаги ўйинлари билан танилган франциялик ҳимоячи Курт Зума фаолиятини Хитой чемпионатида давом эттириши мумкин.
Footmercato нашрининг хабарига кўра, 31 ёшли футболчи Хитойнинг «Шандун Тайшань» клубига ўтишга яқин турибди. Томонлар бир йиллик шартнома имзолашади ва унда келишувни яна бир мавсумга узайтириш имконияти кўзда тутилади.
Тажрибали франциялик ҳимоячининг охирги иш жойи Руминиянинг ЧФР клуби бўлган эди. Ўтган мавсумда Зума бор-йўғи учта ўйинда иштирок этиб, иккита сариқ карточка олди.
Ҳозирги вақтда Курт эркин агент мақомида бўлиб турибди. Унинг бозор қиймати тўрт миллион еврога баҳоланмоқда.
