«Барселона» вингери Ламин Ямал жамоанинг жорий Чемпионлар лигасидаги иштироки ҳақида фикр билдирди.

«Кўк-анорранглилар» умумий босқич турнир жадвалида бешинчи ўринни эгаллаб, мусобақанинг 1/8 финалига тўғридан-тўғри йўлланмани қўлга киритишди. Каталонияликларнинг рақиби плей-оффнинг ўтиш босқичи ўйинлари якунланганидан кейин маълум бўлади.

«Аслини олганда, умумий босқич якунларига кўра эгалланган ўрин у қадар муҳим эмас — бунинг ягона устунлиги дам олиш учун қўшимча имконият борлигида, холос. Кейинги рақибга келсак, шуни биламанки, кимга қарши ўйнашимиздан қатъи назар, биз бор кучимизни ишга соламиз ва ғалаба учун ҳамма нарсани қиламиз», – деди Ямал.

Эслатиб ўтамиз, Чемпионлар лигасининг ўтган мавсумида «Барселона» ярим финалгача етиб борган, бироқ Миланнинг «Интер» клуби тўсиғидан ўта олмаган эди.