«Манчестер Юнайтед» ярим ҳимоячиси Каземиро жорий мавсум якунланганидан кейин клубини ўзгартиради.

Бразилиялик футболчининг кетиши ҳақида январь ойида маълум бўлган эди. Унинг муддати тугаётган шартномаси узайтирилмайди — у эркин агентга айланади. Daily Mail нашрининг хабарига кўра, Каземирони ўз сафига қўшиб олиш имкониятини «Лос-Анджелес Гэлакси» кўриб чиқмоқда. МЛС клуби 33 ёшли хавбекни ўзларининг устувор мақсадларидан бири деб ҳисобламоқда. Футболчининг ўзи эса қарор қабул қилишга шошилмаяпти: у ўз келажаги борасида ёзга яқин бир тўхтамга келиши кутилмоқда. «Реал Мадрид»нинг собиқ юлдузига, шунингдек, Саудия Арабистони, Бразилия ва бошқа чемпионатлар вакиллари ҳам қизиқиш билдиришмоқда.

Каземиро «қизил иблислар»нинг жорий мавсумдаги 23 та ўйинида бешта гол урди ва икки марта жамоадошларига голли узатма берди.